sensibla ed allegra

Ün lung viadi esa da s'approsmar a l'aigna musica e da tilla far resortir da tai svessa. Far da bainvivainta , explorar e dar inavant ils potenzials. As perder ed as chattar darcheu. Giovar a teater, far purtrets, tender fils, squassar vi da muosters fixs, esser originala, immez ed a l'ur. Crear nouvs muonds, s-chaffir qualitats da vita e tillas integrar illa taila dal plaschair da viver. Ingio cumanzar a rapportar?

Pro’l bügl ad Olsberg?
Al mar in Tansania?
Al flüm a Freienstein?
A la riva dal Rain a Basilea?
Al lai a Turich?
Pro l'aual muntagnard i'l Vallais?

Eu m’allegr  da plüssas staziuns da mia vita be aventüras. Infanzia? Allegra e plaina da  pitschens miraculs. Scoulas? Schi, passantà cun grazcha e laschà davo mai cun grazcha. Il mar da robas interessantas es sainza fuond , plain s-chazis chi sun da scuvrir, perscrutar e conquistar. La fuormaziun nu finischa mai!
Aua, fö, terra, ajer, lain, metal, gip, ardschiglia, textilias, culuors e fuormas sun its tras meis mans. S-chaffir di e not, crear. Dapertuot il bsögn d’agir e da partir il buonder e las ideas cun umans.

Viagiar in pitschens e gronds muonds, i'l cheu e sülla terra. «Ballar» süls plü differents palcs: i'l teater, i'l circus, sülla via, giovond, tscherchond, chattond.  Lavur multifara ed universala: animaziuns da gö, pittüra, teater, performances, installaziuns, musica … simplamaing roba universala. Mar sainza rivas! Che nu fast tü vairamaing?
Dürant plüs ons suna viagiada cul fil cotschen e m'ha inlatschada in quista e tschella istorgia. Numerusas exposiziuns e performances in Svizra ed a l'exteriur, simposis, stipendis, sün turnea cul toc teater "Marzipan und Tulipan" e cun bleras prelecziuns ch'eu n'ha accumpagnà cul accordeon. Stüdi intensiv da sunar il balafon, eir concerts cun quel.

Partecipaziun a tants progets per uffants: zambriar, fabrichar, giovar, teater, musica. Uffants, ün visavi ingrazchaivel per fantasia e scuvertas, per schmüravgliar ed agir sinceramaing.

Tuot uschè grondius!
Ma eir lavur düra: tscherchar incumbenzas, quai es sco pes-char! Üna jada üna gronda praja, lura üna pitschna. Mangiar flocs d'avaina e mailinterra, abitar illa cabina. Svolar sü ot e sfuondrar. Strasoras ed ingün vent.

Mia musica s'ha sviluppada. Lecziuns da guitarra, imprender a sunar il balafon, chanzuns in tudais-ch svizzer ed in frances sun nadas.



Ingio chi daiva ün clavazin n'haja sunà ed improvisà uras. Cul accordeon n'haja cumpuonü adüna daplü agens tocs. Il chant es dvantà central! E sco per miracul n'haja chattà inavo pro la guitarra. Ella am sta talmaing a cour. Chanzun per chanzun nascha. Cun quellas n'haja vuglü ir our da mia chombrina … ir a l'ajer … exister … surviver … na be per mai suletta … esser communicativa e quintar. Quintar tuot.

Istorgias musicalas sun funtana d'inspiraziun ed elixir da la vita.
Eu n'ha gnü blera furtüna e n'ha pudü far quint cun blers inscunters e contacts. Ed uschè n'haja pudü dürant ils ultims ons am fermar sün bleras pitschnas islas e cumanzar a chantar.

Meis fil cotschen es la musica, l'amur per la musica. Tuot meis s-chaffir as concentrescha hoz in mias chanzuns. Là daja il plaschair da viver, la feivra da partir, üna pruna impreschiuns. Là chattan meis impissamaints, meis sentimaints ün dachasa. Pleds pon star be per els. Her, hoz e daman as dan il man. La funtana da l'inspiraziun sbuorfla e chatta sias cumposiziuns.

L'essenzial as distacha da la suldüm absoluta cun l’incletta per bsögns profuonds e la vista consciainta sül terrain chi posa. Per la paja fa’l flurir l’entusiassem. Mias chanzuns sun spazis da resun da cuntradas internas, auas quietas e cascadas chi dan üna contura chi sclerischa  mia via da s-chaffir universala. Cun tscherchar aignas structuras e ritems am stordscha i'l rinch e realisesch: quai es necessari.
Üna strategia da surviver na realistica? Utopica, fantastica, ma indispensabla. Musica!

Da pudair viver seis giavüschs e sömmis douvra blera furtüna, voluntà, curaschi e pazienza, ma eir la capacità da decider svessa davart seis agen destin, da til amar e cumbatter per el. In quist cumbat sun eu dvantada a la fin finala meis agen visavi.

Quia stuna uossa e sun pronta dad avair plainamaing fiduzcha illas alas da meis entusiassem e da mia paschiun.

Translatiun: Lia Rumantscha